د اروپايي اتحاديې هېوادونو سفیرانو په بروکسل کې په مقدماتي توګه له سوريې څخه د اقتصادي بندیزونو د لرې کولو هوکړه کړې ده. تمه ده چې دا پرېکړه به د اتحاديې د بهرنيو چارو وزيرانو له خوا د نن ورځې په ناسته کې رسماً اعلان شي.
د پاکستان فدرالي کابینې د سې شنبې په ورځ د دغه هېواد لوی درستیز جنرال سید عاصم منیر ته د فیلډ مارشل رتبه ور کړې ده. عاصم منیر د فیلډ مارشل رتبې ترلاسه کول د پاکستان د خلکو او وسلهوالو ځواکونو ګډ ویاړ بللی.
د هندي پوځ یوه لوړپوړي جنرال ویلي چې هند دومره ځواک او وسلې لري چې کولای شي ټول پاکستان او ژورې برخې یې په نښه کړي.
د اروپایي اتحادیې د بهرني سیاست مشرې کایا کالاس ویلي، هیله منه ده چې د اتحادیې وزیران پر سوریې د لګول شويو اقتصادي بندیزونو د لرې کولو په تړاو هوکړې ته ورسیږي.
د ایلان ماسک په مالکیت سپېس ایکس «سپوږمکیز انټرنیټي خدمات» سټارلینک د سې شنبې په ورځ په بنګلهدیش کې خپل فعالیت پیل کړ. د رویټرز د راپور له مخې، سپیس ایکس شرکت غواړي چې د سویلي اسیا په دغه هېواد کې انټرنیټ ته د باور وړ او نامحدود لاسرسي ډاډمن کولو لپاره خپلې هڅې لا ګړندۍ کړي.
د پاکستان د بهرنیو چارو وزارت وایي، چې د دغه هېواد د لومړي وزیر مرستیال او د بهرنیو چارو وزیر اسحاق ډار د چین لهخوا د پاکستان د «ملي حاکمیت او ځمکنۍ بشپړتیا» په برخه کې د ملاتړ ستاینه کړې ده.
د هند د بهرنيو چارو وزارت مرستيال وېکرم میسري وایي، چې د هند او پاکستان ترمنځ اوربند دوه اړخیزه و. هغه د دوشنبې په ورځ د دغه هېواد پارلماني کمیټې ته په خبرو کې ویلي، چې د «هند او پاکستان د اوربند په خبرو کې امریکا کوم رول نه لاره.»
د کریملین ماڼۍ ویاند دیمیتري پیسکوف وایي، چې د روسیې او اوکراین ترمنځ سوله او اوربند پیچلی دی او د هوکړې د یادښت لپاره هیڅ وروستۍ نېټه نه شي ټاکل کېدی.
په اسراییل کې د هند سفیر جي پي سېنګ وايي، چې د سېندور عملیات درول شوي؛ خو ختم شوي نه دي. هغه له پاکستان نه غوښتي، چې د هند په وروستیو پېښو کې ښکېل «ترهګر» ور وسپاري او خبرداری یې ورکړی چې د پولې هاخوا «ترهګري به له تهاجمي اقداماتو سره مخ شي.»
د پاکستان لومړي وزیر شهباز شریف په یوه بیان کې ویلي، چې وسلهوال د «هند په ملاتړ په پاکستان کې ترهګري او ناوړه فعالیتونه ترسره کوي.» هغه زیاته کړه: «موږ به په پاکستان کې د سولې او امنیت د خرابولو لپاره د هند ناوړه پلانونه شنډ کړو.»
د سعودي عربستان د بهرنیو چارو وزارت د غزې تړانګې په شمالي او سوېلي برخو کې د اسراییل «پوځي یرغل» او روان بریدونه غندلي دي. دغه وزارت په یوه بیان کې ویلي: «دغه ډول کړنې د نړۍوالې ټولنې د ارادې سره په ټکر کې دي.»
د روغتیا نړۍوال سازمان (WHO) د دوشنبې په ورځ اعلان وکړ، چې د نړۍ لږ تر لږه ۷۰ هېوادونو کې خلک له روغتیایي خدماتو بېبرخې شوي، چې پکې افغانستان هم شامل دی. دا وضعیت د روغتیايي پروګرامونو د تمویل د کمېدو له امله رامنځته شوی.
د غزې په سوېل خان یونس کې سلګونو کسانو د حماس پرضد لاریون وکړ. دغو لاریونوالو چې د حماس ضد شعارونه ورکول، د جګړو د پای ته رسېدو او له واک څخه د حماس د لرې کېدو غوښتونکي دي.
د اوکراین ولسمشر ولادیمیر زېلېنسکي له ټرمپ سره تر ټلیفوني خبرو وروسته اعلان کړی، چې هېواد یې له روسیې سره بشپړ او له ځنډ پرته اوربند ته چمتو دی. د هغه په وینا، کییف له مسکو سره مخامخ خبرو ته په هره بڼه او هر ځای کې چمتووالی لري.
ګلف ټوډې راپور ورکړی چې د امریکا ولسمشر ډونالډ ټرمپ د خپلې دویمې دورې په پیل کې د کډوالو پروګرام وځنډاوه او ویې ویل چې دا به تر هغه بیا نه پیلېږي، ترڅو چې د بهرنیو کډوالو راتګ د امریکا له ملي ګټو سره سم نه وي.
د اېبيسي نیوز د راپور پر بنسټ، د اسټرالیا د کوینزلېنډ ایالت پولیسو د بریزبن لوېدیځ ته څېرمه د سپرینګفېلډ په سیمه کې د یوې ۲۳ کلنې ښځې د وژنې په تور د خلیلالله او مسیحالله په نوم دوه افغان وروڼه نیولي دي.
د امریکا ولسمشر ډونالډ ټرمپ وايي، چې د روسیې له ولسمشر ولادیمیر پوتین سره یې په دوه ساعته ټلیفوني خبرو کې هوکړه کړې، چې مسکو او کییف باید «سملاسي» د اوربند د ټېنګښت او جګړې د پای ته رسېدو لپاره مذاکرات پیل کړي.
د روسیې ټاس دولتي خبري اژانس د راپور پر بنسټ، د دغه هېواد د لوی څارنوال دفتر د بښنې نړۍوال سازمان د «نامطلوبو» سازمانونو په نوملړ کې شامل کړی دی.
انګلستان، فرانسې او کاناډا د دوشنبې په ورځ په غزه کې د اسراییل پراخ بریدونه وغندل او ګواښ یې وکړ، که چېرې اسراییل تازه بریدونه ونه دروي او د بشري مرستو بندیز لرې نه کړي، د دوی له اقداماتو سره به مخ شي.
د سپینې ماڼۍ ویاندې کارولین لیوېټ وايي، چې د امریکا ولسمشر مرستیال جيډي ونس د کاتولیکانو له نوي پاپ سره د لیدنې پرمهال نوموړي ته د ډونالډ ټرمپ او میلانیا ټرمپ بلنهلیک وړاندې کړ، څو سپینې ماڼۍ ته سفر وکړي.
د امریکا ولسمشر ډونالډ ټرمپ نن دوشنبه د روسیې له ولسمشر ولادیمیر پوتین سره ټیلیفوني خبرې پیل کړې، څو د اوکراین روانه جګړه چې د مسکو له یرغل وروسته پیل شوې، پای ته ورسوي. د رپوټونو له مخې، ټرمپ تر دې وړاندې له اوکرایني ولسمشر ولادیمیر زیلینسکي سره هم خبرې کړې دي.
د سپینې ماڼۍ یوه چارواکي د نوم نهښودلو په شرط ویلي، چې د امریکا ولسمشر ډونالډ ټرمپ نن د دوشنبې په ورځ د روسیې له ولسمشر ولادیمیر پوتین سره ټیلیفوني اړیکه پیل کړې ده.